L’analisa da bunamain 3’200 tests da corona a San Murezzan mussa, che radund 1% da la populaziun è s’infectada cun il coronavirus – quai correspunda pli u main a la quota da positivitad dals tests da massa dal december . Quai scriva la regenza grischuna.
Tar ils collavuraturs e giasts dals dus hotels en quarantina sajan 4% dals tests stads positivs. Dals 53 cas identifitgads, sa tractia tar 31 d’ina mutaziun dal coronavirus. Ina repetiziun dals tests na saja il mument betg necessaria, cunquai ch'ins haja uschia pudì isolar ils cas positivs.
Il virus mutà han ins mo constatà tar il persunal, e betg tar ils giasts. Quai mussia ch'ils concepts da segirezza dals hotels funcziuneschian, e ch'i saja ina mesira raschunaivla d'adina puspè testar ils collavuraturs, scriva la regenza grischuna vinavant.
Hotels restan en quarantina – scolas avran
L'analisa dals resultats mussa tenor il chantun, che la mutaziun dal virus N501Y n'è betg derasada surproporziunalmain a San Murezzan. Perquai pon las scolas puspè avrir a partir da venderdi, e medemamain las canortas e las scolas da skis a San Murezzan. Ils dus hotels pertutgads restan en quarantina fin ils 27 da schaner.
Medemamain abolescha San Murezzan il scumond da far trenaments ed activitads d'uniuns cun giuvenils, sco era l'obligatori da purtar mascrina sin l'entir territori da vischnanca.
L'Uffizi da sanadad avertescha però la populaziun da vinavant star attent, tegnair distanza, evitar contacts socials betg necessaris e sa tegnair vi da las reglas d'igiena. Er tar be levs sintoms saja da laschar far in test da corona per proteger ils conturns socials.