La dumengia avevi anc ina tribuna cun 180 musicantas e musicants, cun chantaduras e chantadurs ed ussa – mo in di suenter – è la halla Gurlaina vida. Andrea Matossi, il president da Scuol Classics, è in dals sulets ch'è anc sin la plazza – la tribuna, las sutgas, la decoraziun, tut è gia davent.
3000 aspectaturas ed aspectaturs han visità ils concerts ed engrazià a tut las protagonistas e tut ils protagonists cun in cordial «standing ovation».
Vegni a dar in proxim project?
Il quint final n'è anc betg sin maisa, ma il president Andrea Matossi è da buna speranza. Singuls quints, sco per exempel il quint da l'ieli per stgaudar la halla, mancan anc, ma Matossi fa quint cun ina nulla naira. Il preventiv aveva prevesì custs da radund 400’000 francs.
Durant il davos concert ha il dirigent dal Golden Gate Symphony Orchestra, Urs Leonhard Steiner, tschentà la dumonda al public sch’els turnassian anc ina giada en dus onns. Las aspectaturas ed ils aspectaturs han manegià da bain. Il proxim project pudess esser «Carmina Burana», ha il president Andrea Matossi ditg. Ma fin uss stat ina decisiun anc en las stailas.