Radund 180 musicists ed musicistas han intgantà il public en la halla da glatsch Gurlaina ch'è vegnida transmidada en ina sala da concert cun chant e musica. Cumenzà la saira ha il chor cun duas chanzuns rumantschas. Suandà ha la solista Cinzia Regensburger cun la chanzun «Rhapsody in Blue» ch'è vegnida accumpagnada dal Golden Gate Simphony Orchestra da San Francisco.
Scuol Classics è ina collavuraziun tranter il Golden Gate Symphony Orchester, chantaduras e chantadurs indigens sco era musicists da tut il mund. En tut datti quatter concerts ch'han lieu enfin ils 16 da zercladur. En il center da la seria da concerts stat la novavla sinfonia da Beethoven.
Oda a l’allegrezza
Punct culminant da la saira da premiera è stada la 9avla Sinfonia da Ludwig van Beethoven sut la batgetta da l’iniziant da Scuol Classics, Urs Leonhard Steiner. Il Grischun abita dapi 40 onns en l’America ed è savens en vacanzas en l'Engiadina Bassa. Suenter numerusas provas sajan uss tuts cuntents da pudair mussar quai ch’ins ha exercità en il project sur cunfin tranter l’America e la Svizra
Uss cumenza il temp da dessert. Uss pudain giudair, sunar e chantar per la glieud. Quai è in privilegi.
Il project transcontinental haja plaschì fitg bain al public. Perquai sajan ils organisaturs er gia vi da planisar ina proxima ediziun – tut tenor gia en dus onns, uschè Urs Leonhard Steiner. La societad «Scuol Classics» aveva fatg quint cun radund 4’000 entradas per las quatter sairas da concert. Ils ultims dis haja dà in stumpel tar la vendita da bigliets. Ins saja uss sin buna via, las sairas sajan occupadas fitg bain, di il president dal comité d’organisaziun, Andrea Matossi.
Blers m’avevan ditg ch'jau dess restar calm, ch’ils bigliets vegnian schon anc cumprads. Uss è quai il cas ed jau sun levgià. Per mia gnerva avess quai però pudì esser pli baud il cas.
Prova generala cun 200 uffants
Las emprimas aspectaturas ed ils emprims aspectaturs han gia pudì visitar il concert che dura passa 70 minutas durant la prova generala. Il public consistiva or d'uffants da la regiun ch'èn vegnids envidads dals organisaturs. Sin quella moda han ils organisaturs vulì dir grazia a la regiun per il sustegn, era finanzial.
Per ils total 200 uffants èsi stà ina pussaivladad unica da visitar in concert classic d'ina tala dimensiun en la regiun.
