Atgnamain avess l'Institut Otalpin a Ftan era sa participà cun ina gruppa da radund 30 scolaras e scolars al project musical. Ma organisatoricamain na saja quai betg ì si e quai munta ina sfida per las manadras da las provas engiadinaisas Cinzia Regensburger e Nina Mayer. La nova schliaziun è dentant, ch'ellas engaschan 12 chantaduras e chantadurs da profi per cumplettar il chor. L'ovra è fitg pompusa ed era pretensiusa da chantar. Cunzunt cun l'orchester che vegn latiers dovria quai in chor cun in bun volumen, di la musicista da professiun Cinzia Regensburger.
Igl è pli patgific per tuts quels che chantan sch'il chor è pli grond.
Chantà vegn quatter dis en roda durant ils concerts plus anc la prova generala, quai saja fitg strentg ed intensiv. Uschia èn las organisaturas ledas dal sustegn dals profis.
Provas pli pitschnas che prevesidas
-
Bild 1 von 2Legenda: In toc pretensius: Dirigenta Nina Mayer vegn accumpagnada da Cinzia Regensburger al clavazzin. RTR -
Bild 2 von 2Legenda: Trenament en l'Hotel Scuol Palace Set fins d'emna da provas datti en l'hotel Scuol Palace sut la batgetta da Nina Mayer, accumpagnada da Cinzia Regensburger al clavazzin. Era da la partida è il president da Scuol Classics Andrea Matossi (davostiers sanester). RTR
Plirs giubileums en ina – ma plitost per casualitad
Il toc principal dal concert da Scuol Classics è bain la 9avla sinfonia dal cumponist tudestg Ludwig van Beethoven (1770 - 1827). Avant precis 200 onns ha questa sinfonia festivà sia primaudiziun. Igl è stà la davosa sinfonia cumplettada dal grond cumponist tudestg.
Era preschentà vegn il toc da Rhapsody in Blue dal cumponist american da Broadway George Gershwin. Quel festivescha il 2024 100 onns primaudiziun. Lezza ha gì lieu a New York ils 12 da favrer 1924.
Ed era l’onn 2024 festivescha il chantun Grischun sia existenza da 500 onns. Ina casualitad da bleras datas, sco quai ch’il president da Scuol Classics, Andrea Matossi, di envers RTR. L’idea era da gia mussar il program il 2023, ma cun l’organisaziun saja sa spustà sin quest onn ed uschia sa dettian gist bleras casualitads da dats, manegia Matossi vinavant. Ma Scuol Classics na vegnia betg fatg a posta per las festivitads da 500 onns Grischun.