RTR: Rainer J. Schweizer tenor Vus èn las renfatschas da la cumissiun da gestiun pertutgant la plazza aviatica Samedan gravantas?
Sch'ins legia quest rapport dal 2023 èsi starmentus ch'igl è vegnì constatà ch'ins n'ha betg pudì controllar expensas e ch'i manca quittanzas ed in schuber rendaquint. En sasez fissan quai pensums elementars per ina instituziun da dretg public. Latiers para era in reglament intern da l'organisaziun da mancar. Ins n'ha betg propi stgaffì ina basa legala.
RTR: Fissan las persunas involvidas u ils gremis chastibels ord vista giuridica?
Sch'i fissan chastiablas na sai jau betg valitar. Dentant pudessan ellas vegnir fatgas responsablas sut tschertas circumstanzas. Quella dumonda sa tschenta. Quai datti tar donns ch'èn vegnids chaschunads ord greva negligientscha, dentant cun in termin da surannaziun da tschintg onns. Quai vul dir ch'ins pudess laschar valitar sche persunas u ils gremis èn culpabels per las perditas da l'organisaziun ils davos tschintg onns e stuessan forsa pajar insatge vi dals tals.
RTR: In advocat extern ha valità la situaziun ed ha tranter auter preschentà en ses rapport ch'il register da commerzi na saja betg vegnì actualisà dal 2017 enfin il 2022. Co valitais Vus quai?
Jau pens che quai è in cas gravant ed ins po tschantschar da negligientscha. Mintgin che maina in'interpresa sa che quai sto vegnir fatg. Quai n'è betg da perdunar. Qua han ils gremis disditg. La fin finala è quai era relevant per il schurmetg dals crediturs.
RTR: Avess era il chantun stuì intervegnir?
Quai è per mai la dumonda decisiva. Nua era la surveglianza da finanzas ils davos onns pertutgant la plazza aviatica da Samedan? Tenor ina ordinaziun dal 2015 ston tuttas vischnancas sco era las organisaziuns externas – sco per exempel la plazza aviatica – preschentar lur quints annuals al chantun. Sche jau fiss involvì sco vischnanca vuless jau savair pertge ch'il chantun n'ha betg controllà. Surtut sch'ins sa ch'ils quints n'eran per part betg avant maun u senza quittanzas. Quai para a mai in cass gravant ed uschia ha er il chantun ina tscherta responsabladad per la situaziun ed il svilup da la plazza aviatica a Samedan.
