La critica d’enfin ussa pertutga il project da renovar la plazza aviatica. Il 2017 ha la populaziun bunifitgà in credit da 22 milliuns. Il davos vegniva dentant discurrì da projects tranter 22 fin 80 milliuns – quai ha dà da discurrer fermamain. Adina puspè hai dà opposiziun cunter quest project da renovaziun.
Datti in responsabel per il debachel?
Sbagls sajan vegnids fatgs en tuts reguards. Tenor l'expert e giurist neutral ch'è vegnì incumbensà da la Conferenza da la plazza aviatica d'analisar la situaziun sa tractia d'ina «panna collectiva» – in culpant principal na dettia betg en quest cas.
Communicaziun «catastrofala»
Uss è vegnì a la glisch co che la communicaziun tranter ils onns 2017 e 2022 ha funcziunà – numnadamain tut auter ch'optimal. Ins pudess bunamain numnar la communicaziun catastrofala. Schegea che la communicaziun duess en sasez funcziunar cun las cundiziuns, structuras e leschas existentas, n'èsi betg reussì als trais gremis involvids – Conferenza da la plazza aviatica, la cumissiun administrativa e finalmain la cumissiun sindicala – da collavurar. Plinavant n'han ils gremis era betg controllà u surveglià in l'auter.
Co vai vinavant cun il project?
Mario Cavigelli – ch'è pir dapi il 2023 president da la cumissiun administrativa – vul sa concentrar sin la realisaziun dal project da renovar la plazza aviatica Infra. El na veglia betg surpigliar la funcziun sco «manager da crisa».
Tuts èn la culpa, ins po pia trair qua in stritg, quai pudess ins pensar per il mument. Ma jau na crai betg che quest chapitel è gia a fin cun quai.
L'avust ha lieu la proxima sesida da la conferenza da la plazza aviatica. Alura vegnan ins a savair dapli.
Georg Luzzi
Redactur Engiadina
