Las funtaunas termalas da San Murezzan èn las pli veglias e situadas il pli aut en las Alps. Ellas èn stadas l'entschatta dal turissem, perquai che giasts bainstants da tut l'Europa viagiavan gia en il temp da bronz e lura dal temp dals Romans a San Murezzan per baiver aua curativa u far bogn en quella.
La tschiffada da la funtauna che vegn ussa salvada è il relict il pli vegl dal turissem tempriv en il territori alpin. El è uschia in bain cultural d'impurtanza internaziunala. Sco Thomas Reitmaier ha ditg envers RTR, saja la tschiffada stada radund in meter sut l'aua, probablamain per pliras uras. Ussa saja da valitar ils donns. Ensemen cun spezialists da la protecziun civila vegnan ils radund 100 tocs laina analisà e silsuenter transportà en ina halla nua ch'els pon siar en cundiziuns controlladas. Sin l'emprima egliada pari d'avair dà be pitschens donns. Uss saja d'evitar ch'i dettia problems cun stgarps durant il siar, ha ditg Thomas Reitmaier vinavant.
Il center da sport Ovaverva è puspè avert
En il center da sport vischinant Ovaverva aveva aua donnegià intgins indrizs tecnics en il plaun sut e laschà enavos en gardarobas, duschas e pliras autras stanzas ina stresa da sablun fitg fin. La nettegiada da las localitads è stada difficila, il center ha però puspè pudì avrir.
L'aua gronda aveva tranter auter donnegià l'indriz da pumpadi da la ruschnera, dentant betg tut la tecnica. Era intgins sistems electronics han stuì vegnir tgirads. Las glischneras vegnan ad esser serradas anc in temp.
