Cun in resultat da 757 vuschs ha l’independent Christian Jott Jenny fatg la cursa per il presidi dals proxims quatter onns. Ses cuntracandidat da l’Allianza dal center, Martin Binkert ha survegnì 644 vuschs.
La participaziun a la votaziun a l’urna è stada tar 57,6%.
Christian Jott Jenny sa legra sin ils proxims quatter onns ch’el vegn ad esser al timun da la vischnanca.
Jau sper che nus rivain da trair cuminaivel vid ina suga e realisar las tematicas ch’èn propi relevantas per nossa vischnanca.
113 vuschs han mancà a Martin Binkert per il presidi communal da San Murezzan. Il candidat da l’Allianz dal center è trumpà da betg avair reussì, dentant veglia el cuntinuar cun sias caricas politicas. Binkert è vegnì elegì en il Cussegl Grond e vegnia er a candidar puspè per in sez en il parlament da San Murezzan ils 25 da settember 2023.
Cumbat electoral en gasetta
Las ultimas emnas han inserats e surtut chartas da lecturs emplenì entiras paginas en la gasetta locala. Tar Christian Jott Jenny han er fatg part gronds placats publitgads en vischnanca a la campagna electorala. Per tuts dus candidats en cursa hai er dà inserats en furma da statements da persunas ord politica, turissem ed economia che pledeschan per lur candidat favurisà.
Entant che Martin Binkert aveva inoltrà sia candidatura gia il november dal 2021, ha Jenny spetgà fin l’ultim mument pussibel.
