S-chanf - Bazar en l'hotel Scaletta

A S-chanf spetgan da tutta sorts glieud cun tastgas e perfin valischs davant l’hotel Scaletta – e quai gia ina mes’ura avant ch'il bazar cun l'inventar vegl da l'hotel bandunà cumenza. Cun il sun dal zain dal clutger s'avran las portas da l’hotel. La glieud entra l’hotel e sa metta a sfugliar en la rauba ch'è rasada ora sin maisas in las localitads da l'hotel. I dat plats, padellas, pusada ed ina pluna autra vaschella en tuttas furmas e grondezzas. Sper rauba da cuschina datti era pitschnas mobiglias da lain – tut quai sto svanir. Singula rauba – sco per exempel las bellas stgaffas da lain – è marcada cun in grond punct blau, quels na dastgan ins betg prender. Ma quai na para betg da disturbar la glieud pli fitg. Tuts e tuttas sa fatschentan cun las autras raubas e chaussas ch'ins po prender.

Impressiuns

Tranter ils visitaders è era Schimun Caratsch. Tenor el raquintan ils objects istorgias da temps passads, nua ch'ils magiels da vin vegnivan anc duvrads per far viva e las maisas n'eran anc betg plain pulvra. Schimun Caratsch ha passantà bler temp da sia uffanza en l'hotel che tutgava pli baud a sia nona. L'ultim possessur – avant che l'hotel ha serrà – è però stà in Ollandais, uschia che betg bleras regurdanzas da sia nona èn restadas. Tuttina fa quai in pau mal al cor a guardar co che la chasa sa svida, di Schimun Caratsch:

In auter visitader dal bazar è Ernst Parli. Era el è a la tschertga da rauba custaivla. El era pli baud lavurant da vischnanca, ussa s'occupescha el gugent cun l'istorgia da la vischnanca da S-Chanf. Sia tschertga ha purtà fritg: sin il palantschieu ha el chattà in cudesch vegl da contabilitad. Quel è vegnì scrit da l'emprim possessur da l'hotel, Lucas Wehrli. En quai cudesch èn notà divers quints da vin e da chombras, ma era las investiziuns dal prim hotelier dal Scaletta. Ina da quellas investiziuns era il clavà dasper l'hotel. Ernst Parli pensava che quest clavà vegniva duvrà sco transit per chavals e viturins da la posta. En la contabilitad è dentant notà ch'il clavà vegniva duvrà per l'agen bain puril. Pli tard – durant la prima guerra mundiala – eran staziunads qua uffizials. En la sala gronda era perfin drizzà en in lazaret durant la grippa spagnola. Suenter las guerras mundialas èn puspè vegnids ils giasts da la Svizra e dals pajais cunfinants.

Impressiuns

Per il mument vegnan ni il clavà ni l'hotel duvrà. I dat dentant plans per midar quai: I duai da nov dar 27 chombras, 8 appartaments ed in’ustaria per in total da stgars 14 milliuns francs. Actualmain mancan anc circa ina mesa milliun francs. Tuttina veglian ins cumenzar la primavaira cun las lavurs da construcziun, di Mengia Mathis ch'è commembra dal cussegl da la fundaziun per l’hotel Scaletta: