S-chanf - Nova vita per l'hotel Scaletta

A S-chanf è segirà l'avegnir da l'hotel istoric «Scaletta» ch'è dapi 10 onns vid. La societad Reka surpiglia il manaschi d'hotel e maina quel durant almain 20 onns. La fundaziun Scaletta S-chanf e la Reka han decis da far in partenadi, sco quai ch'i ha num en ina communicaziun. Igl è il terz manaschi che la Reka ha en l'Engiadina, ils ulteriurs dus èn a Scuol ed a Madulain.

27 chombras, appartaments ed in restaurant

Per il «Scaletta» – ch'era oriundamain duas chasas da purs – èsi planisà 27 chombras, 8 appartaments, ed er in restaurant public cun radund 120 plazs. Tant la Reka sco era la fundaziun accentueschan da focussar sin aspects da la persistenza. L'hotel vegnia collià cun la rait da chalur da S-chanf, ed i duai dar ina construcziun cun materials locals. E per il persunal vulan ins duvrar sinergias cun las duas ulteriuras chasas da la Reka en Engiadina. Ins quinta cun radund 20 fin 30 novas plazzas da lavur, e radund 10'000 fin 12'000 pernottaziuns ad onn.

Suenter la cumpra e la sanaziun duai l'hotel puspè vegnir avert sin la stagiun d'enviern il 2026/27. La lubientscha da construcziun è gia dapi il 2021 avant maun, uschia che las lavurs pon cumenzar la primavaira che vegn.

La fundaziun dovra anc daners

Ils custs totals per la cumpra e la sanaziun muntan a 14,7 milliuns francs. La Reka surpiglia ina summa «considerabla», sco ch'i ha num en la communicaziun. Plinavant vegn la fundaziun sustegnida dal chantun, da la Confederaziun e da divers fauturs e fauturas privatas. Cun ils daners possian ins fin l'atun 2024 cumprar l'immobiglia e cumenzar cun las lavurs da preparaziun. La fundaziun dovra dentant anc dapli daners – i manca anc radund ina mez milliun francs agen chapital. Il president da la fundaziun, Herbert Schmid, parta dentant dal fatg ch'ins possia anc rimnar quels. Ins saja il mument en ina intensiva fasa da fundraising ed en discurs cun diversas fundaziuns. Quai ha il president da la fundaziun ditg envers la Posta Ladina.