Radund 20 persunas s’hajan entant furmadas ad ina gruppa d’interess per in Na al project Samedan Solar. Iniziant è l’anteriur vicedirectur da las Ouvras Electricas Engiadina OEE, Roland Andri. Tenor el dettia plirs puncts critics che sajan anc da sclerir e surtut era da preschentar a la populaziun.
La dumonda dals custs per ils singuls consuments a Samedan na saja betg clera e Roland Andri menziuna tranter auter era l’aspect estetic d’in implant che vegniss realisà sin ina surfatscha da 40 hectaras e ch’ins vesess da dalunsch davent.
Ils plans cunter il project duain suandar
La gruppa d’interess n’haja betg anc plans concrets co ch’els vulan infurmar la populaziun davart lur plans. Quai capitia tenor l’iniziant dentant en vista a la radunanza communala che tractandeschia la dumonda dal terren per il project.
La dumonda da princip per pudair cuntinuar cun il project Samedan Solar aveva la radunanza communala da Samedan approvà ils 13 da fanadur 2023.
La «Energia solara engiadinaisa» è vi da tractativas cun ils 11 possessurs da terren a Samedan. En in proxim pass ha la populaziun da decider sche la vischnanca metta a disposiziun ses terren per il project solar.
