A Samedan duai vegnir construì l’onn proxim in’ovra solara. Planisada è quella sin la planira tranter la plazza aviatica ed il Flaz, sco che Martin Merz, il president dal cussegl d'administraziun da la firma Energia solara engiadinaisa ha ditg. La planisaziun fa la firma indigena ensemen cun la firma TNC Consulting SA.
Ovra producescha 37 GWh electricitad
Il project previs ha ina dimensiun da 40 hectaras e duai producir en in onn 150% da l'energia che l’entira vischnanca da Samedan dovra. Cun plaina capacitad saja quai energia per passa 12'000 chasadas. 50% da l’energia possia vegnir producida durant ils mais d’enviern, uschia Merz.
Il lieu sper la plazza aviatica saja ideal, perquai ch’ins possia colliar differentas infrastructuras existentas. E sin ina tscherta distanza na saja l’ovra quasi betg visibla.
Da princip naginas objecziuns da la protecziun da la cuntrada
Samedan sco lieu na saja da princip betg in no-go, di Raimund Rodewald da la Fundaziun svizra per la protecziun e la tgira da la cuntrada. Il lieu da l'ovra saja gia utilisà tras l'infrastructura existenta, quai saja il motiv principal per betg intervegnir.
Sch’ina tala ovra sto vegnir construida en il liber sin la prada verda, lura damanaivel ad infrastructura existenta.
Ils iniziants han preschentà il project a la populaziun. Sche tut va sco planisà, duai l’ovra solara a Samedan ir en funcziun la fin da l’onn 2024.
