Il project da Brass Band Terra Raetica ha gì la finiziun en la sala polivalenta a Tschlin. Circa 250 persunas han tadlà il concert dals 35 musicants e musicantas.
Project interregiunal e sur cunfins
La «Interreg Terra Raetica» è ina organisaziun per la collavuraziun sur cunfins tranter las regiuns dal Vnuost, dal Tirol dal Nord e da la regiun Engiadina Bassa Val Müstair. 18 projects interregiunals èn planisads enfin l’onn 2027 e quels duessan chattar collavuraziuns tranter ils trais pajais da la Svizra, Italia ed Austria. In da quels è la Brass Band Terra Raetica. La mira da quest project è dad unir musicants e musicantas e cun quai promover la musica.
Provas cun dirigent e musicists professiunals
Durant trais fin d’emnas han ils 35 musicants e musicantas trenà sut la batgetta da Tristan Utt, dirigent da professiun. Tenor el era la qualitad da la musica pli auta che previs. Uschia hajan ins pudì lavurar dapli vi dal «sound» da la Brass Band. Para ha quai plaschì er als participants e participantas. Els ed ellas han pudì profitar da la savida dals manaders, dals registers ed era dal dirigent.
Planisà da cuntinuar
Tenor Roberto Donchi, manader dal project, duai l'onn che vegn dar in'ulteriura ediziun da la Brass Band Terra Raetica. L'emprim però, vul l’organisaziun dumandar ils participants e las participantas tge e co ch’ins pudess megliurar il project.
