Gian Peter Niggli surpiglia ad interim la direcziun da l'INFRA, l'organisaziun che posseda l'infrastructura da la plazza aviatica Samedan. Quai ha l'INFRA communitgà mesemna. Gian Peter Niggli – president communal da Samedan e fin uss vicepresident da l'INFRA – surpiglia il timun, perquai ch'il president Christian Meuli ha l'emna passada annunzià da chalar.
Demissiun nunspetgada
Christian Meuli banduna l'organisaziun sin la fin d'avust. El saja pliras giadas vegnì attatgà persunalmain dad adversaris d'in project da svilup per la plazza d'aviatica. Las renfatschas e pretensiuns fatgas envers sia persuna sajan malfundadas e surpassian ina lingia cotschna, aveva Christian Meuli scrit l'emna passada en ina communicaziun. Er la INFRA sez crititgescha en sia communicaziun attatgas persunalas sin singuls commembers da la cumissiun. La cumissiun administrativa deplorescha la decisiun da Christian Meuli da sa retrair.
L'incumbensa principala da Gian Peter Niggli saja uss, dad accumpagnar la procedura da decisiun davart il svilup futur da l’eroport. La fin da settember ha lieu latiers in workshop sco occurrenza d’infurmaziun e discussiun. Quel saja la basa per la decisiun davart il futur dal eroport. La fin d'october vul la conferenza da la plazza aviatica decider co agir vinavant.
