Plazza aviatica Samedan - Dus onns retard e radund 4 giadas pli char

«Nus essan sin buna via», uschia hai glindesdi gì num tar la conferenza da medias da l’interpresa d’infrastructura «INFRA» che persequitescha da modernisar la plazza aviatica a Samedan . L’emprima etappa da construcziun saja da nov pli vasta e duai cumenzar il 2023. Sper il svilup da coc cumpiglia quella ussa numnadamain era in’ulteriura etappa da svilup, ch’era anc a l’inizi dal project planisada en ina segunda fasa.

Dentant cumenzan las lavurs da construcziun pli tard che planisà. Oriundamain avessan quellas numnadamain stuì cumenzar quest onn. Il motiv per quest retard saja il temp. Sco Daniel Peter, il directur da la «INFRA» ha ditg, hajan ins sutvalità ils process dals scleriments preliminars.

Custs 4 giadas pli auts

Tras quai che l’emprima fasa da construcziun è pli auta s’augmentan er ils custs dal project. Auter sco previs l’onn 2017, cun custs totals da 22 milliuns francs, èn uss previs custs totals da radund 88 milliuns francs. Per la differenza vul ins uss ir en tschertga d’investiders privats, sco Christian Meuli, il president da la «INFRA» ha ditg ad RTR. Tema da betg chattar quels na sa haja betg. Quai er pervia dil fatg ch’ina part da quels custs èn custs da terz sco per exempel la Rega.

Tuttina nagina saiv enturn ed enturn l’areal

In dals puncts ils pli dispitaivels da l’entir project è l’uschenumnada protecziun da perimeter. Quella na vegnia uss tuttina betg fabritgada sco quai ch’ins aveva planisà a l’entschatta. Suenter discurs cun l'Uffizi federal d’aviatica civila sco era diversas cuminanzas d’interess, hajan ins ussa pudì adattar la construcziun d’ina saiv sin in concept che resguarda ils ristgs situativs sin il lieu.

Vul dir concret ch'i na dat nagina saiv universala e nuninterrutta, mabain soluziuns individualas per las differentas zonas da la plazza aviatica. Sco per exempel ina saiv da segirezza cun camera datiers ils edifizis, ina saiv da protecziun pli bassa cun signals ed eventualmain cameras enturn la pista e lura servia ina part dal areal anc sco protecziun natirala per in aual.