La Guardia aviatica svizra da salvament remplazza tranter ils 2024 e 2026 si'entira flotta da helicopters. Da nov duai la flotta consister da be pli in model, numnadamain 21 helicopters da salvament dal tip pli actual Airbus Helicopters H145. Quels na sajan betg be pli effizients, mabain er pli gronds. Uschia saja da gronda impurtanza che la Rega possia remplazzar il hangar cun in edifizi pli grond, suttastritga l'organisaziun en ina brev a las autoritads ed a las medias.
Il hangar existent sin l’areal da la plazza aviatica da Samedan ha entant 46 onns e saja memia pitschen per ils novs helicopters. Sco il CEO Ernst Kohler ha ditg envers RTR fetschia tut gronda prescha. El ha perquai preschentà a chaschun dal segund lavuratori da la INFRA plazza aviatica er sia proposta:
A la Rega duai vegnir mess a disposiziun ina parcella en il perimeter da la plazza aviatica da Samedan per ch’ella possia planisar e realisar sez ina nova basa.
In scenari ch’il president da la INFRA, Gian Peter Niggli, na vesa betg propi sco opziun realistica.
Nus essan cun grond tempo vi da sviluppar in project per la plazza aviatica a Samedan, quai cun involver er ils partenaris e purtaders en la discussiun. Fatg quint vegn cun l'entir perimeter che stat a disposiziun ed en quel è er previs in hangar per la Rega.
Ils plans per la futura plazza aviatica duajan esser pronts per preschentar l'avrigl dal 2023.
Tant Ernst Kohler sco er Gian Peter Niggli suttastritgan l’impurtanza d’ina basa da la Rega en Engiadina. Sch’i vegn a dar ina soluziun per la Rega a Samedan fin il 2026 mettan tant il CEO Ernst Kohler sco er Gian Peter Niggli da la INFRA en dumonda.
Er auters pretendan ina modernisaziun
Da la basa da Samedan vegnia mintg'onn sgulà da quai da 700 acziuns da salvament. Ma betg be la Rega ha pretensiuns, quai resulta dal segund workshop che duai gidar da surlavurar il project da modernisaziun dispitaivel. Da la vart da la hotellaria èsi surtut vegnì menziunà quant gronda che la valur dals giasts dals hotels da 5 stailas saja per l'Engiadin'ota. E quels apprezieschian in curt viadi tranter la plazza aviatica, l'hotel e la muntogna – spetgian però er ina plazza aviatica moderna. Il project stoppia perquai vegnir realisà tant pli spert. Gia avant duas emnas aveva ina emprima gruppa discutà davart il svilup da la plazza aviatica. Ils resulats dad omadus workshops vegnan ussa resumads e furman la basa per surlavurar il project da modernisar la plazza aviatica. Quel duai lura vegnir preschentà l'avrigl.