La cuminanza d’interess «IG ZWET Scuol» ha passa 200 commembras e commembers, possessurs/as da segundas abitaziuns. L’organisaziun ha preparà per ils commembers in catalog cun propostas ed objecziuns areguard la revisiun da la planisaziun locala. Enfin la fin d’october dura anc la procedura d’examinaziun nua che tut la populaziun ha la pussaivladad d’inoltrar propostas d’adattaziun.
Divers puncts dischavantagius per possessurs d'ina segunda abitaziun
La proposta da la lescha surlavurada da la vischnanca prevesa per exempel la pussaivladad d’expropriar parcellas da fabrica suenter otg onns sche quellas na vegnan betg nizzegiadas. Plinavant prevesa quella la fabrica dad emprimas abitaziuns sch'ina chasa da dretg vegl vegn spazzada.
Las finanzas fan quitads
La proposta da la revisiun prevesa d’introducir taxas directivas, ina unica ed ina annuala, plinavant duessan abitaziuns vegnir deliberadas dad ina imposta sin segundas abitaziuns sche quella vegn fittada dapli che 200 dis per onn. Per il president da la IG ZWET Scuol Sascha Ullmann sa tractia da blers millis francs.
Ins na sto betg emblidar che nus pajain gia impostas regularas, ina taxa da turissem etc.
La procedura d’examinaziun dura anc enfin il cumenzament dal mais november. Il president Ullmann spera che blers possessurs da segundas abitaziuns profitan dal catalog ed inoltreschan las objecziuns che dischavantageschan ils possessurs da segundas abitaziuns.
