Il 2015 ha gì lieu la fusiun da la vischnanca da Scuol ma entant datti sis leschas da construcziun e mintga fracziun ha differentas zonas da construcziun e mastergn. Plinavant n'è betg reglà en l'entira vischnanca la situaziun da segundas abitaziuns. E finalmain ha era il chantun e la Confederaziun relaschà diversas prescripziuns che ston vegnir integradas en la nova planisaziun locala da la vischnanca da Scuol.
Sur in lung temp han ils responsabels da la vischnanca elavurà ina proposta e quella è ussa vegnida exposta publicamain a la populaziun. La populaziun ha, a chaschun da sairas d’infurmaziun, la pussibilitad da far dumondas ed inoltrar midaments. Il temp per far dumondas ed inoltrar midaments dura anc fin l’entschatta da november.
La zona da construcziun è il tema central
Il tema dominant tar la populaziun e natiralmain la dumonda tge che capita cun la zona da construcziun enturn la chasa u ina parcella a l'ur da la vischnanca, ma era proprietaris da segundas abitaziuns vulan savair sch’els stoppian pajar en avegnir eventual ina taxa directiva.
Las actas da la revisiun totala da la vischnanca da Scuol è exposta publicamain anc fin il prim da november.
La vischnanca prevesa d’elavurar las dumondas entradas da la populaziun durant il proxim enviern. Suenter prevesan ins da suttametter la revisiun totala da la planisaziun locala a l’urna durant l’onn 2025 u eventualmain era pir l’onn 2026.
