La via dal Bernina duai daventar pli segira e pli attractiva. La regenza grischuna ha dà glisch verda al project da renovaziun e da revitalisaziun da l'Ova da Bernina. Per 20,44 milliuns francs vegn uschia schlargià la via tranter Morteratsch e Bernina Suot, revitalisà il flum e creà ina plazza panoramica. Da quest custs surpiglia il chantun var 17 milliuns. Ils custs restants surpiglian la vischnanca da Puntraschigna, la Viafier retica, sco er differents proprietaris dals stabiliments.
-
Bild 1 von 2Legenda: Chantun Grischun -
Bild 2 von 2Legenda: Chantun Grischun
La via tranter Morteratsch e Poschiavo è vegnida realisada l'entschatta dals onns 1970 ad ina ladezza da 6 meters. Dapi lura èn vegnidas fatgas mo pli lavurs da mantegniment. Sco la regenza scirva, na correspundia il traject tranter Montebello e Bernina Suot oz betg pli al standard. En il rom dal project duai il traject perquai vegnir schlargià al profil traversal regular da 7 meters.
Entras quest project vegnan per part duvrads spazis da viver ch'èn protegids tenor la lescha da protecziun da natira e patria. Quests spazis da viver ston perquai vegnir cumpensads. En dus lieus tanghescha la construcziun da la via fermamain il curs actual da l'aual. Sco mesira da cumpensaziun vegn il letg actual da l'Ova da Bernina perquai spustà en direcziun laterala. Ultra dal spustament dal letg duai l'Ova da Bernina vegnir revitalisada cumplettamain tranter Plattas e Bernina Suot sin ina lunghezza da circa 1,5 kilometers. Plinavant duai l'aual vegnir pli lad. Ils custs per revitalisar l'Ova da Bernina importan circa 2,6 milliuns francs.
Or da l'archiv: