Cun ina lescha da promoziun d’abitaziuns per indigens vul la vischnanca da Schlarigna dar a sasezza l’incumbensa da daventar anc pli activa sin il martgà d’emprimas abitaziuns. Quai di Christian Brantschen, il president communal da Schlarigna. La suprastanza ha pia elavurà ina proposta d’ina lescha che prevesa pliras mesiras. Tranter auter la realisaziun d’abitaziuns tras la vischnanca, la surdada da dretgs da fabrica u er la pussaivladad da fundar cooperaziuns da purtaders da construcziun.
Naginas mesiras tar abitaziuns da dretg vegl
La strategia saja cleramain d’investir sin il prà verd, uschia Brantschen. Be taluisa possian ins finalmain garantir fits pajabels. Scleriments da mesiras tar abitaziuns da dretg vegl han numnadamain demussà che talas mesiras na sajan betg realisticas.
Zona da planisaziun pudess vegnir annullada
La vischnanca da Schlarigna haja avunda reservas per fabritgar ils proxims onns var 120 novas abitaziuns, uschia il president communal. Tras la vendita da la chasa Faratscha èn la stad passada idas a perder 22 abitaziuns indigenas en la vischnanca. Sco consequenza aveva la suprastanza decis da decretar ina zona da planisaziun sin il territori communal. Sche la lescha da promoziun vegn approvada a la proxima radunanza communala, vegniss la zona da planisaziun puspè annullada.
