L'InnHub SA La Punt aveva inoltrà trais dumondas da construcziun tar la vischnanca da La Punt Chamues-ch.
- Construcziun d’in tunnel sco access per la nova garascha
- Sbuvar edifizis existents sin l’areal
- Construir nov InnHub
La dumonda da construcziun era publitgada durant 20 dis. Cun la data dals 10 d’avust 2023 è il temp per recurrer terminada. Tenor infurmaziuns dal chanzlist da La Punt Chamues-ch, Urs Niederegger, saja vegnì inoltrà enfin uss in recurs encunter la construcziun dal nov bajetg InnHub.
Schliar cun tschertgar discurs
Tar il recurs sa tractia d'objecziuns ch’ins dumognia da sclerir cun il recurrent, è persvadì il chanzlist. D'ina vart saja ina stanga da profil vegnida montada al faus lieu durant il temp d’exposiziun, da l’autra pretenda il recurrent che persunas ch’èn involvidas en il project, hajan da s’abstegnair da la vusch tar decisiuns en connex cun il project da l’InnHub.
A la proxima sesida da l'uffizi da construcziun da La Punt Chamues-ch vegnia tractandà il recurs en detagl, uschia Niederegger. Tenor el duessan cumenzar las emprimas lavurs per il tunnel quest settember. L'InnHub SA La Punt prevesa da realisar sin l’areal Truochs/La Resgia in center d’innovaziun da lavur, sport, restauraziun, seminari, in hotel ed abitaziuns. L'avertura è previsida il 2026.
