Tenor infurmaziuns da la polizia saja l'aviun partì a las 17:20 da Samedan en direcziun Roskilde (Danemarc). Duas minutas pli tard è la maschina crudada a La Punt Chamues-ch en ina zona abitada ed è ars cumplettamain. Tut las persunas en l'aviun èn mortas, scriva la Polizia chantunala. L'identificaziun formala da las victimas mortalas na saja però betg anc terminada.
Uschè tragic che quella crudada è cun tut questas unfrendas, avessi anc pudì esser bler mender sche l'aviun fiss crudà sin las chasas d'abitar.
Igl avess anc pudì esser bler mender sche l'aviun avess tutgà las chasas d'abitar, ha ditg Anita Senti, pledadra da medias da la polizia chantunala envers RTR. En questa zona d'abitadi vivan persunas sur tut onn, sco er datti abitaziuns da vacanzas.
Ed er il chanzlist communal da la Punt Chamues-ch Urs Niederegger na gughegia betg da s'imaginar tge che fiss capità sche l'aviun fiss crudà en ina da las chasas, ha el ditg en in discurs cun l'agentura da novitads Keystone-SDA. Tenor il president communal Peter Tomaschett na sajan dentant fin ussa betg s'annunziadas persunas che abiteschan directamain sper il lieu d'accident.
-
Bild 1 von 3. Bildquelle: Polizia chantunala.
-
Bild 2 von 3. Bildquelle: Polizia chantunala.
-
Bild 3 von 3. Lieu da la crudada. Bildquelle: BRK News.
Il territori da la disgrazia saja serrà fin ch'ins ha terminà las lavurs da rumida. Plinavant è er il spazi d'aria serrà almain fin mardi saira las 18:00 – quai en conturn dad in kilometer fin 2'200 meters d'autezza. Quai vala per tut ils aviuns, sco er per dronas.
Al lieu da l'accident èn stads en acziun ils pumpiers da la Plaiv, il salvament Engiadin'Ota, la Rega, l'Uffizi per la natira e l'ambient e la polizia chantunala dal Grischun.
-
Bild 1 von 2. La polizia ha bloccà il lieu d'accident. Bildquelle: BRK News.
-
Bild 2 von 2. Detagls n'èn fin mardi avantmezdi anc betg stads enconuschents. Bildquelle: BRK News.
Sco proxim cumenzas las lavurs d'inquisiziun. Las raschuns per la crudada da l'aviun vegnan intercuridas da la Procura publica federala en coordinaziun cun il Servetsch svizzer d'inquisiziun da segirezza (SUST), la Procura publica grischuna, la Polizia criminala federala e la Polizia chantunala dal Grischun.