Las giassas da Tschlin eran durant ils ultims mais plain giats selvadis. La cifra era explodida, e per la populaziun èn ils giats daventads in problem. Tenor Georg Janett da Tschlin han ils giats fatg lur affar en ierts e schizunt en ils autos.
Betg pavlar giats selvadis
L’invasiun da giats saja capitada causa che glieud haja pavlà quels, di il chanzlist da Valsot Christian Poo. Sch’ils giats sa sentian bain e vegnian pavlads, dettia duas giadas l’onn pitschens e la cifra creschia ad in crescher. Ensemen cun la clinica da bestgas ha la vischnanca lura lantschà in’acziun da chastraziun. Ensemen cun collegas ha Georg Janett mess traplas per tschiffar ils giats, ed en la Clinica Alpina a Scuol han ins chastrà quels.
Acziun da success
Var 40 giats selvadis sajan vegnids tschiffads, radund in terz haja però stuì vegnir durmentà perquai ch’els eran en in nausch stadi da sanadad. Per singuls giats ha la Clinica Alpina chattà in nov dachasa, ed auters han ins purtà enavos a Tschlin. Quai saja impurtant per ch’il territori restia occupà, ha declerà il manader da la clinica Benjamin Biner. Avant che turnar èn ils giats però vegnids chastrads per evitar in’ulteriura multiplicaziun. Sco ils responsabels han infurmà, haja l’acziun gì success ed en las giassas da Tschlin saja puspè pli quiet.
Or da l'archiv:
Er a Vaz hai quest onn dà in problem cun giats selvadis. Vers 30 giats eran da viadi che na tutgan a nagin.
Ils giats tutgan tar ils animals stgarpants. Els mangian blers animals pli pitschens ed han ina gronda influenza sin la populaziun dals animals pli pitschens.
