Per giudair il chant da laud «Laudes» dal quartet cun Sybille Diethelm, Barbara Schingnitz, Emauel Heitz e Clemens Kölbl, han ins gì da star si baud la dumengia bun’ura. Il chant gregorian a la riva dal Lej da Staz ch’ha gì lieu en il rom dal program dal Festival da Jazz, ha numnadamain cumenzà a las 05:30.
L’access al Lej da Staz per il public è be pussibel a pe ubain cun il bike. Ni il viadi tras la stgiraglia, ni las temperaturas bassas cun rugada da la damaun, han dentant impedì radund 700 persunas da vegnir a tadlar il chant.
Durant stgars in’ura han giasts ed indigens tadlà il chant sin sutgas u per terra sin cuvertas durant la levada dal sulegl. La tschajera sur il Lej da Staz ha curunà l’atmosfera en moda mistica. Il resun dal public perquai er adina il medem.
Jau sun intgantada dal chant sacral che nus avain udì e l’atmosfera si qua è unica e mistica.
Suenter ina pausa dad in’ura e mez è il program dal Festival da Jazz cuntinuà a las 08:08 cun in concert da la chantadura «Nubya».
Il punct culminant ch’attira mintg’onn fitg blera glieud, segua la saira a las 19:00 cun in concert da «Morcheeba» a la riva dal Lej da Staz.
Sper in vast program durant trais emnas èn differentas localitads en ils conturns da San Murezzan, porscha il Festival da Jazz er mintg’onn concerts sut tschiel liber per in e mintgin. Cun ils concerts gratuits enturn il Lej da Staz (tranter Puntraschigna e San Murezzan) veglia l’organisaziun er engraziar a la regiun, uschia il Festival da Jazz en sia communicaziun.
