Il 2019 è vegnì lantschà in project per engrondir il perimeter sin l'entir territori communal da Scuol e quel da Valsot. Sut il label «UNESCO Reservat da biosfera Engiadina Val Müstair» èn oz participads il Parc da Natira Biosfera Val Müstair, il Parc Naziunal Svizzer ed ina pitschna part dal territori da Scuol. Quai duess ussa restar uschia.
Las raschuns
Tenor la presidenta da la Regiun Engiadina Bassa Val Müstair Gabriella Binkert-Bechetti datti divers arguments che discurran encunter quest project inizià. Sco emprim argument menziuna ella la mancanza d’interess sin livel politic, ma era la populaziun e l’economia locala demussan pauc interess.
Plinavant datti era gia la Pro Terra Engiadina ch'exista dapi radund 15 onns. A quella sa participeschan las vischnancas da l’Engiadina Bassa, divers uffizis chantunals, uniuns per la protecziun da la natira, plinavant era il turissem. La Pro Terra Engiadina è enorm activa e s’engascha gia fitg ferm ils secturs natira e cultura, uschia Binkert-Bechetti.
La porta resta tuttina averta
Per las vischnancas Scuol e Valsot resta la porta tuttina averta. La presidenta da la regiun Gabriella Binkert-Bechetti – e medemamain era presidenta dal turissem Engiadina-Scuol-Samignun-Val Müstair – vul en avegnir nizzegiar meglier il label «UNESCO» e sche quai avess da purtar fritgs, han las duas vischnancas la pussaivladad da reponderar.
