Igl è stà in vair terratrembel en la branscha da construcziun, cura che la cumissiun da concurrenza WEKO ha publitgà il rapport davart il cartel da construcziun avant precis in onn. Il pli ferm pertutgà èn fin uss stads ils impressaris engiadinais.
In onn suenter è quai anc adina in tema. El penda sco ina nivla sur ils chaus dals impressaris tar la occurrenza da primavaira da la Societad grischuna d'impressaris a Puntraschigna. Discurrer avert na vul nagin, ma igl è cler, ch'il rapport occupa anc adina.
Emprender londerora e guardar enavant
I na fa damai betg star stut ch'ils impressaris engiadinais e da las vals dal sid èn d'accord cun il project da compliance che la societad grischuna ha lantschà. Cun quel vulan ils impressaris mussar si ed intunar, ch'els tegnan en las reglas e leschas che valan.
Quai è ina conclusiun or dal scandal, logic. Ma nus lain mussar en la publicitad che nus avain emprendì insatge londerora.
Trais puncts duain vegnir implementads en ils statuts da la Societad grischuna d'impressaris:
- il dretg da cartel
- la protecziun da datas
- la corrupziun
I saja temp da guardar enavant, è Markus Derungs persvadì. Mo uschia possian ins daventar pli ferms sco mai e quai saja la finamira. La decisiun davart la revisiun dals statuts croda a la radunanza generala da la Societad grischuna d'impressaris ils 26 avrigl a Scuol.
RR actualitad 06:00
