Durant la conferenza da pressa en il Partenz ha Andreas Felix declerà ch'el sa retiria da la candidatura per la regenza grischuna. Plinavant dat el era giu ses post sco president da la Partida burgais-democratica ed el na candidescha n'er betg pli per il cussegl grond. Cun quai terminescha Andreas Felix sia carriera politica. La decisiun saja sia decisiun persunala ch'el haja prendì oz a bun'ura ensemen cun sia famiglia e betg ina decisiun da la partida. Felix accentuescha anc ina giada ch'el n'haja fatg nagin sbagl en connex cun las cunvegnas da pretschs che sajan vegnidas fatgas durant presesidas da l'uniun d'impressaris constructurs.
Il donn che saja dentant vegnì fatg a l'uniun dals impressaris constructurs dal Grischun sforzian el da pigliar enta maun quella chaussa e da sa concentrar pli fitg sin sia lavur sco mainagestiun da l'uniun.
PBD deplorescha ma chapescha
Sia partida deplorescha ch'el sa retira. Els èn persvas che Felix fiss stà in enritgiment per la regenza grischuna. La PBD deplorescha e chapescha dentant ch'el vul sa concentrar sin sia lavur sco mainafatschenta da l'uniun, per far urden là. Els stoppian acceptar la decisiun suenter lungas discussiuns da persvader el da star, ha declerà Gian Michael, il manader da la campagna electorala da la PBD.
La partida ha declerà vinavant ch'els veglian pigliar vair lur responsabladad da reger e ch'els candideschian ussa sulet cun Jon Domenic Parolini sco candidat.
RR novitads 20:00
