Il Forum Engadin lantscha la petiziun ensemen cun la Fundaziun per la protecziun da la cuntrada, il WWF e la Pro Natura. Suttascriver pon tant indigens sco era giasts. L'avrigl duai ella vegnir surdada a la Regiun Malögia.
Tenor la petiziun na saja ina saiv enturn la plazza aviatica a Samedan betg necessaria.
Ni l'Uffizi federal d'aviatica civila ni l'Administraziun da duana pretendan ina saiv, ed era per evitar accidents cun selvaschina e peduns na dovri betg ina tala.
Dals ultims 60 onns na saja betg enconuschent in accident cun selvaschina u peduns. Vias u viafiers sajan pli privlusas e n'hajan naginas saivs, hai num en la petiziun.
Proteger la cuntrada
En pli interrumpess ina saiv da trais meters autezza e trais kilometers lunghezza la vista sur la planira da la plazza aviatica, argumenteschan ils iniziants da la petiziun.
In mobigliament da la cuntrada sto vegnir impedì.
In ulteriur punct da critica è la finanziaziun da la saiv. Previs fiss numnadamain che la publicitad pajass la saiv, profitar dad ella profitass dentant lura il gestiunari privat da l'Engadin Airport.
Ord l'archiv:
RTR novitads 12:00
