Emprim di da scola - Tarasp – ina da las pli pitschnas scolas dal Grischun

15 scolaras e scolars. Quai n'è betg il dumber da classa, mabain il dumber total da scolaras e scolars en la scola primara da Tarasp. Pia, ina scola fitg famigliara nua ch'i vegn instruì en duas stanzas a moda cumplessiva.

Plaschair dentant era sfida

30 onns è questa scola particulara gia il lieu da lavur dad Aglaia Gallmann da Tarasp, magistra ed il medem mument era manadra da scola. Instruir en quest ambient fetschia anc adina fitg grond plaschair. Oravant tut perquai ch’ins po esser pli innovativ e spontan ch'en auters lieus pli gronds.

Dentant è il manaschi da questa scola onn per onn era ina gronda sfida – saja cun l'intschertezza dal dumber da scolaras e scolars, il cumbat per il dretg d’existenza sco era l’integraziun dad uffants dad autras naziunalitads. Sfidas che fissan gia grondas avunda en vischnancas pli grondas cun dapli scolaras e scolars.  

Tuttina, cun agid da la vischnanca, spera Aglaia Gallmann ch’ins possia mantegnair era vinavant questa purschida fitg unica e speziala.