Prisca Anand e Christoph Schlatter hajan cuntrafatg als statuts da la PLD cun candidar sco independents, scriva la suprastanza da la Partida liberaldemocratica Engiadin'Ota/Bregaglia en ina communicaziun. Perquai haja ella intimà els da sortir da la partida. Surtut perquai che la partida locala da San Murezzan aveva nominà ils dus candidats en uffizi, Regula Degiacomi e Michael Pfäffli e sco nov candidat Christoph Schlatter.
La suprastanza da la PLD da l'Engiadin'Ota scriva enavant, ch'ella avess acceptà ina candidatura dad Anand/Schlatter dasper quella da Degiacomi/Pfäffli sut la cundiziun ch'els s'engaschian era suenter in'elecziun per la Partida liberaldemocratica. Sin quai sajan els sa cunvegnids cun tut ils involvids suenter in discurs communabel. La suprastanza deploreschia la sortida, hai num vinavant.
Renfatschas envers la partida
Prisca Anand e Christoph Schlatter avevan communitgà ils 10 d'avust 2022 ch'els sajan sa decidids da sortir da la partida. Quai suenter ch'els sajan vegnids mess sut squitsch da diversas varts. Tras quest agir saja vegnì destruì blera fidanza, uschia Anand e Schlatter. Ch'i dettia differenzas aifer la PLD communala era gia vegnì a la glisch la fin da fanadur. Perquai avevan els annunzià d'ir sco independents en la cursa per las elecziuns da la suprastanza.
Il cumenzament da las differenzas
I haja dà adina puspè conflicts tranter la fracziun da la PLD, ils dus commembers da suprastanza actuals ed ina part da la basa da la partida. Cun lur candidatura van Prisca Anand e Christoph Schlatter en directa cursa encunter ils dus cussegliers communals da la PLD Regula Degiacomi e Michael Pfäffli. Quels candideschan sez er per in'ulteriura perioda d’uffizi.
San Murezzan dovra ina cultura da discussiun vivida e respect envers differentas opiniuns. Ils dus cussegliers communals ed ina part da la partida locala na partan betg quai pensar.
Sco Christoph Schlatter ha ditg envers RTR, haja la partida locala nominà avant duas emnas ina candidatura da trais per la suprastanza cun Regula Degiacomi, Michael Pfäffli e Christoph Schlatter. El sez saja sa decis da sa retrair da quella, per ir en cursa sco independent e betg per la PLD, ensemen cun Prisca Anand. Ultra da quai pretenda Schlatter ch’ils dus commembers en uffizi Degiacomi e Pfäffli, sajan vegnids nominads encunter la voluntad da la fracziun da la PLD.
Il suveran da San Murezzan elegia ils 25 da settember l'executiva e la legislativa per ils proxims quatter onns.
