Il turissem sa chatta al cumenzament d’ina nova era. Quai è la tesa futuristica ch’era vegnida elavurada da la suprastanza da la destinaziun San Murezzan Engiadina Turissem il 2011. Sco cussegliader da scenaris pussibels per la regiun d’Engiadin’Ota ils proxims onns era s’engaschà Klaus-Dieter Koch.
A la radunanza generala da la destinaziun Engiadina Turissem a Segl, ha il cussegliader da strategias da marketing examinà durant in referat ils resultats da las prognosas fatgas avant 14 onns. Sco adina sajan singulas visiuns sa verifitgadas, autras betg. Trais puncts ha Klaus-Dieter Koch menziunà explicitamain.
Nua che nus avevan raschun era il tema da la mancanza da collavuraturAs, il ferm franc svizzer ed er l’integraziun da possessurs da segundas abitaziuns.
Persvadì è l’expert er dal fatg ch’il giast futur na vegn betg pli a sa dumandar «nua vegn jau en vacanzas, mabain daco vegn jau en questa destinaziun a passentar mias vacanzas». Impurtant vegnia ad esser che l’ospitant porschia al giast elements ch’èn stgars en la vita sco: temp, siemis u er desideris. Il pled «Social Health» vegnia ad esser adina pli impurtant, è persvadì Klaus-Dieter Koch.
Social Health è il grond tema da noss temp. Nus avain adina dapli colliaziuns via social media, ma nus n’avain betg pli dretgas relaziuns. L’isolaziun è tras quai ferm preschenta, tant tar persunas giuvnas sco era pli veglias.
Per las destinaziuns turisticas sur 1’500 meters sur mar vesa Klaus-Dieter Koch in avegnir per las regiuns da skis, dentant vegnia quest'activitad sportiva ad esser ina che betg pli mintgina po sa prestar.
La destinaziun Engiadina Turissem sa prepara per ils midaments e ses avegnir, uschia il president dal cussegl administrativ Kurt Bobst. La purschida da basa cumpletteschian els cun ulteriuras mesiras en ils secturs da well-being, new work e neoecologia. Ultra da quai è ina da las finamiras strategicas da prolungar las stagiuns en Engiadin’Ota. Ils sforzs sajan sa verifitgads, ha Bobst ditg a la radunanza generala a Segl, il resultat dal 2024 è tar las pernottaziuns d’hotel per 1,1 % pli aut che l’onn avant.