Per l'emprima giada conferma il Tribunal federal administrativ en ina sentenzia ch'i ha dà cunvegnas da pretschs en il rom dal cartel da construcziun en l'Engiadina. Il tribunal ha confermà las sancziuns envers la firma Foffa Conrad AG en ina da las disposiziuns. Quella aveva fatg recurs en chaussa.
En tut datti 10 disposiziuns da la cumissiun da concurrenza WEKO en il rom dal cartel. Tar la sentenzia d'oz sa tracti dad in recurs encunter in dals «pitschens cas», i va per sancziuns dad 1 fin 20 000 francs.
Ina cuntravenziun da la lescha è mussada si
Uschia conferma il Tribunal federal administrativ las renfatschas da la WEKO a la Foffa Conrad SA d'avair fatg en quel cas ina offerta memi'auta, per ch'in autra firma da construcziun survegnia l'incumbensa. La WEKO haja mussà si suffizientamain che la Foffa Conrad SA haja cuntrafatg al dretg da cartel.
Er l'autezza da la multa vegn sustegnida da la dretgira. Quella vegn basada sin l'offerta e la grevezza dal surpassament. La sancziun cunter la quala la firma ha intercurì cumpiglia 1 fin 20'000 francs. La Foffa Conrad SA po trair vinavant la sentenzia davant il Tribunal federal.
L'atun 2012 ha la WEKO cumenzà cun investigaziuns pervia da l'avis dal whistleblower Adam Quadroni. Ella ha finì giu diesch retschertgas cun in'ordinaziun en ils onns 2017 fin 2019.
