A chaschun da l’ultima sesida dal parlament da San Murezzan èn vegnids concedids 12,25 milliuns francs per sanar il bogn Ovaverva. La sanaziun è daventada necessaria perquai ch’ins ha chattà mancanzas vi da isolaziuns cunter l’aua sutterrana e quella vi dals batschigls da bogn curt suenter l’avertura il 2014. En ils custs totals èn er previsas lavurs pli grondas per adattar ils batschigls. Be questas midadas custan var in milliun francs che la vischnanca duai purtar sezza. Bunamain in onn vegn il project da sanaziun a durar, e durant quest temp na duai betg be il manaschi dal bogn vegnir meglierà, mabain er giavischs da la clientella duain vegnir resguardads. Quests projects opziunals custan anc ina giada var in milliun francs.
Betg anc sclerì la dumonda dals custs
Ina buna purziun dals custs totals da 12,25 milliuns francs duessan tenor ils responsabels da la vischnanca pajar interpresas falliblas. Gia cura ch’ins ha chattà ils donns ha la vischnanca instradà pass giuridics.
Or da l'archiv
