La cumissiun «Sanaziun Ovaverva» ha infurmà il parlament da San Murezzan ch’ins possia cumenzar cun la sanaziun dal Bogn Ovaverva pli tard che prevesì. Il favrer da quest onn aveva ella anc skizzà ch’ins faschess quint da cumenzar cun las lavurs da sanaziun il pli baud il mez dal 2024. Ussa sa retardeschian quels plans.
Reglar la finanziaziun
Per pudair lantschar il project da sanaziun dovri numnadamain l’emprim ina finanziaziun garantida, uschè la cumissiun «Sanaziun Ovaverva». Quella vegn a preschentar il project il november. La suprastanza da San Murezzan duai silsuenter tractar quel il december per mauns dal parlament che vegn a decider il schaner 2024. Fin là na saja betg anc garantida la finanziaziun e las lavurs na possian era betg vegnir surdadas.
Per evitar ch'il bogn restassia serrà durant duas stagiuns d’enviern duain las lavurs da sanaziun perquai cumenzar la primavaira 2025, uschè l'argumentaziun da la cumissiun «Sanaziun Ovaverva».
8,7 milliuns francs per sanaziun
Il bogn cuvert ha gia dapi onns da cumbatter cun donns considerabels. Tranter auter hai donns vi da l'isolaziun dal palantschieu, vi da las paraids ed ils tumbins. La sanaziun per mitigar quels donns vegn a durar 13 mais. Durant quel temp vegn il bogn a restar serrà.
