Whistlebowers survegnan bunamain adina problems suenter avair relevà malfatgs zuppads. Els vegnan persequitads u spretschads. Edward Snowden ha stuì fugir en Russia. Esther Wyler e Margrit Zopfi èn vegnidas relaschadas suenter ch’ellas avevan fatg public irregularitads en l’uffizi social a Turitg.
Er la vita dad Adam Quadroni è sa midada cumplettamain suenter ch’el ha raquintà avant 10 onns a la WEKO dals cartels grischuns. Tuttenina è el stà confruntà cun plants, inquisiziuns e proceduras giudizialas che pertutgan:
- famiglia
- concurs
- inculpaziuns penalas encunter el
- delicts nua ch’el è unfrenda
Adina puspè vegn rapportà da singulas sentenzias. Ina survista da tuttas proceduras manca dentant fin uss. RTR ha retschertgà tar dretgiras, procuraturas ed advocats per pudair dar ina survista davart ils cas pendents ed ils process terminads.
Separaziun da famiglia
Il 2017 è la famiglia dad Adam Quadroni sa separada. Gist pliras decisiuns dal Tribunal federal pertutgan il dretg dal whistleblower da vesair ses uffants. Suenter quatter onns han las dretgiras decidì definitiv davart las reglas da separaziun. Ma questas reglas valan be provisoric fin tar in divorzi. Lez è pendent a la dretgira regiunala Malögia.
Oriundamain era gea la dretgira regiunala Engiadina Bassa/Val Müstair responsabla per la separaziun. Ma Orlando Zegg, il president da lezza dretgira, era stà accusà pervi dad abus d’uffizi tar in’acziun da polizia encunter Adam Quadroni. Perquai ha la dretgira Malögia surpiglià il divorzi.
Policist – culpant u betg?
En il fratemp è Orlando Zegg vegnì declerà sco nunculpant. Il process ha gì lieu l'onn passà a la dretgira regiunala Partenz/Tavau. Lezza dretgira ha er acquittà in policist ch’era vegnì accusà d'avair sfalsifitgà in protocol d'acziun da polizia. Quest cas è vegnì tratg vinavant ed è uss pendent tar la Dretgira chantunala.
Tut las renfatschas encunter persunas d’uffizi – policists, derschader e medi districtual – en connex cun las duas acziuns da polizia tar Adam Quadroni il 2017 ha examinà il procuratur public extraordinari Urs Sutter.
La procedura cunter il medi districtual ha il procuratur public sistì. Er dus ulteriurs policists n’ha il procuratur betg accusà. Ma i ha dà protestas cunter las duas decisiuns da sistida che pertutgan ils policists. La Dretgira chantunala sto uss decider sch’il procuratur public sto persequitar vinavant ils dus cas u betg. I vala la presumziun d’innocenza.
Retratg denunzias cunter Quadroni
Il whistleblower sez è er vegnì denunzià, per exempel dad autoritads pervi da disfamaziun u da sia dunna pervi da violenza a chasa. Circa in mez tozzel da questas denunzias sajan vegnidas retratgas ed Adam Quadroni saja vegnì indemnisà, di ses advocat. Er la denunzia pervia da violenza a chasa saja vegnida retratga.
Pendenta è dentant anc la denunzia da l’anteriur fiduziari dad Adam Quadroni che renfatscha ad el in concurs fraudulent. I vala la presumziun d’innocenza.
Concurs cumplitgà fin al Tribunal federal
Plinavant è Adam Quadroni ì concurs. En sasez sa tracti gist da trais differents concurs. L’emprim ha la Linard Quadroni SA stuì vegnir liquidada. Cun quest concurs è sa fatschentà duas giadas il Tribunal federal. Lura èsi stà da liquidar la Quadroni & Partner GmbH. Uss è be anc pendent il concurs privat.
Ils derschaders da Losanna èn sa fatschentads circa in tozzel giadas cun cas che pertutgan direct u indirectamain Adam Quadroni. Il whistleblower ha pliras giadas survegnì raschun. Il Tribunal federal ha per exempel confermà duas giadas che las instanzas grischunas han retardà las decisiuns da reglar il dretg da visitar ses uffants.
In'autra sentenzia è sa fatschentada cun il film DOK «Der Preis der Aufrichtigkeit». In exponent da l’Engiadina Bassa aveva renfatschà ch'il film na saja betg objectiv. Il Tribunal federal è vegnì a la conclusiun ch’il film documentar satisfetschia als principis d’objectivitad.
Chamona da chatscha
Plinavant ha Adam Quadroni survegnì raschun pertutgant sia chamona da chatscha. La primavaira passada ha la dretgira regiunala Partenz/Tavau decidì ch’el ha il dretg da salvar la chamona da chatscha che la vischnanca aveva vulì pretender enavos.