Il settember da l'onn passà aveva la dretgira regiunala Partenz Tavau decidì ch'Orlando Zegg n'haja betg commess abus d'uffizi, sco er privaziun da la libertad. Cunter questa decisiun avevan la procura publica sco er Adam Quadroni appellà.
La procura publica aveva accusà Orlando Zegg, il president da la dretgira regiunala Engiadina Bassa Val Müstair, d'avair malduvrà ses uffizi en connex cun in'acziun cunter il «whistleblower» Adam Quadroni. Medemamain aveva Adam Quadroni purtà plant en connex cun privaziun da la libertad e constricziun.
Uss che tant la procura publica sco er Quadroni han retratg l'appellaziun cunter la sentenzia, è suenter passa in mez onn vegnida valaivla la decisiun dal settember.
