500 onns Trais Lias - Il Grischun sa celebrescha anc ina davosa giada

Durant tut l'onn ha il chantun Grischun organisà en plirs lieus uschenumnadas «Bundstag», festas per commemorar l'istorgia dal Grischun. E sco davos è la Val Müstair vidlonder. Sco ch'il chantun scriva, haja la Val Müstair gia dapi tschientaners gì ina gronda impurtanza. Dad ina vart era la val en in lieu impurtant per il commerzi ed il transit. Da l'autra vart hai adina puspè dà battaglias en questa regiun. I saja pia in bun lieu sco punct culminant per l'onn da giubileum ch'aveva in budget prevesì da 2 milliuns francs.

Festa da la racolta sco punct d’attracziun

Il giubileum è vegnì cumbinà cun la tradiziunala Festa da la racolta en Val Müstair. Radund 5’000 persunas èn vegnidas a Valchava per vesair il cortegi cun ina ventgina da societads ch’èn sa preschentadas, in cortegi sut l’ensaina da 500 onns Trais Lias, cun 350 persunas.

Sper ils products indigens ch’èn vegnids preschentads e vendids durant il martgà, ha er il teater istoric «Spranza chi vegnan meglders temps» attratg l’attenziun da la glieud. Il teater, scrit dal pèr Eva e Magnus Schleich, han acturas ed acturs da las gruppas da teater da la Val Müstair interpretà sin il palc sut tschiel liber, sut la batgetta da Chasper Ans Gaudenz.

Adattà al tema