Il sport da polo exista dapi bunamain 3'000 onns ed ha ses origin en l’anteriura Persia. Il gieu è arrivà en Engiadina enturn l'onn 1899 tras schuldads englais. Dapi 40 onns vegn giugà per puncts er sin la naiv, numnadamain sin ina vetta da glatsch.
L’Engiadinais Reto Gaudenzi era vegnì en contact cun il sport da polo durant ses temp en Spagna. Suenter ch’el era crudà giu dal chaval pliras giadas, ha el passentà trais emnas da vacanzas en l'Argentinia per emprender il sport da fund ensi.
Returnà da l’Argentina sun jau cun quatter chavals. Dapi lura hai jau giugà 46 onns polo.
Ensemen cun l’anteriur directur da cura da San Murezzan, Hanspeter Danuser ha Reto Gaudenzi fundà ils 26 da schaner 1985 il turnier da polo sin il lai schelà da San Murezzan – ina premiera.
40 onns sport e glamour
L’eveniment è fitg impurtant per San Murezzan tenor Reto Gaudenzi. El fa quint cun ina valurisaziun da 25 milliuns francs che vegn generada grazia al turnier da polo sin naiv en l'Engiadina. Quel tutga tar las cumpetiziuns da la pli auta liga, nua che sis squadras cumbattan per la trofea.
Ditg fitg simpel sa tracti da giugar golf sin in chaval cun cullas pli grondas oranschas.
Il turnier da Polo on Snow a San Murezzan duai esser accessibel per in e mintgina. Uschia è er l’entrada libra. Unicamain per seser sin ina da las tribunas dovri in bigliet. Là prenda surtut clientella ritga plazza, savens vestgida cun pellitschas e manteluns.
Impressiuns dal turnier
-
Bild 1 von 4Legenda: RTR -
Bild 2 von 4Legenda: RTR
-
Bild 3 von 4Legenda: RTR
-
Bild 4 von 4Legenda: RTR
Alloschi luxurius er per animals
Gia plirs dis avant ch’il turnier da polo cumenza, arrivan er ils 116 chavals en lur «hotel» a San Murezzan. Responsabel per quel alloschi è Gian Clalüna da Segl.
Nossa obligaziun è d'ir enturn cun ils chavals precisamain uschia sco cun ils chavaltgaders e las chavaltgadras.
La pli gronda sfida saja la midada suenter polo sin naiv a la proxima gronda occurrenza cun chavals, il «White Turf». Aifer be dus dis hajan las plazzas en stalla puspè dad esser prontas per ils proxims giasts sin quatter chommas, uschia Gian Clalüna.