L’onn 2024 n’è betg l’onn da las occurrenzas sin ils lais schelads. Ils organisaturs da las cursas da chaval White Turf , da la bobera u er dal maraton da skis engiadinais han numnadamain tuts gì da cumbatter cun la situaziun betg optimala dal glatsch. Entant ch’il maraton da skis engiadinais ha gì in concept d’urgenza per in tal cas ed ha pudì vegnir realisà sin in traject alternativ, ha il White Turf stuì annullar las cursas da l’ultima da las trais dumengias e la bobera ha stuì serrar in’emna pli baud che previs.
Glatsch pli e pli problematic
Tenor il climatolog Engiadinais, Jan Sedlacek, pudess la situaziun dal glatsch sin ils lais daventar ina gronda sfida en l'avegnir. Enfin uss saja la Svizra sa stgaudada per 2 grads sur l’entir onn, la tendenza dals proxims onns è pli u main medema. A lunga vista, pudess quai daventar fatal per il glatsch. Naiv percunter, vegnia adina a dar. Grazia al stgaudament da l’atmosfera pudess quai numnadamain er dar en avegnir blera naiv, tenor Jan Sedlacek. Per il glatsch duvrass quai però temperaturas bassas, quai che pudess daventar problematic.
Chattar uss ina strategia per occurrenzas
Il stgaudament dal clima na lascha er betg fraid ils organisaturs da las occurrenzas sin ils lais. Tenor Marijana Jakic, la directura da San Murezzan Turissem, saja uss da preparar ina strategia per il futur.
En 100 onns na datti betg pli ils eveniments sin il lai en la medema furma sco oz. Per restar flexibels stuain nus perquai far ponderaziuns uss.
Entant ch’igl è pussaivel, vegnian las occurrenzas sin il glatsch ad avair lieu. Il medem mument vegnia però sviluppada ina strategia per l’avegnir.
Dapli annullaziuns d’occurrenzas sur ils onns
Gia en ils davos onns han tschertas occurrenzas stuì vegnir annulladas pervi da la situaziun dals lais en l'Engiadina. La segirezza na po savens betg vegnir garantida tar temperaturas memia autas. I resta pli e pli mo l’annullaziun.
Las temperaturas da media en creschidas tendenzialmain sur ils onns. Quai svilup mussa la grafica vi da l'exempel da Segl Maria per il mars. Las temperaturas sa movan pli e pli savens en ina regiun che na tanscha betg per laschar schelar suffizientamain ils lais.
