La terza dumengia dal White Turf a San Murezzan na datti naginas cursas. Pervia da la situaziun da l'aura actuala hajan els abolì tut las cursas da chaval per ils 18 da favrer, ha ditg il president dal comité d'organisaziun Thomas Walther envers il schurnal regiunal da SRF:
Il problem na saja betg il glatsch directamain, mabain ch'igl haja lieus nua ch'aua vegnia atras, e quests lieus na schelian betg, uschia ch'i na saja betg pussaivel da preparar ina pista per la cursa da la dumengia.
Tgi ch'ha gia cumprà in'entrada u in bigliet per la tribuna per las cursas da White Turf survegn enavos ils daners. L'areal saja tuttina avert la fin d'emna, scrivan ils organisaturs en ina communicaziun. L'entrada è gratuita.
