En la Ems Chemie èn sa radunadas bun 2'000 persunas a la 61avla radunanza generala da l'interpresa. Tenor la manadra Magdalena Martullo-Blocher haja la Ems Chemie gì in onn da gestiun difficil cunquai che la conjunctura en l'Europa saja schletta. Perquai vegnia ussa mess dapli paisa sin il svilup d'innovaziuns, uschia sajan actualmain almain in quart da las collavuraturas e collavuraturs da l'Ems Chemie occupads en quest sectur. Ultra da quai vegnan realisads projects da renovaziun e d'amplificaziun sin l'areal a Domat per radund 300 milliuns francs.
La radunanza generala ha approvà tut las propostas dal cussegl administrativ. A las acziunarias ed als acziunaris vegn pajada ina dividenda ordinaria da 12,75 francs brutto ed ina dividenda extraordinaria da 3,25 francs brutto per aczia al num autorisada da retrair dividendas. La dividenda da totalmain 16 francs per aczia è pia per 4 francs pli bassa che l'onn avant. Las dividendas vegnan sbursadas a partir dals 15 d'avust 2024.
En il cussegl administrativ èn vegnids reelegids la commembra actuala ed ils commembers actuals: Bernhard Merki (president), Magdalena Martullo (vicepresidenta) e Rainer Roten. Da nov è vegnì elegì Kaspar Kelterborn. Sco post da revisiun è vegnida tschernida la BDO AG a Turitg. Vinavant en uffizi è Robert K. Däppen sco represchentant independent.
Damain svieuta, ma dapli gudogn per l'Ems Chemie
L'Ems Chemie ha fatg damain svieuta l'emprim mez onn, pia dal schaner fin il zercladur. Cumpareglià cun la medema perioda da l’onn passà saja la svieuta sa reducida per 8% sin 1,09 milliardas francs. D’attribuir saja quest resultat tenor il convern surtut al ferm franc svizzer.
Grazia a fatschentas novas profitablas sin nivel global saja dentant gartegià d’augmentar il gudogn operativ per 4% sin 291 milliuns francs en quest emprim semester. Cunzunt en las regiuns da l'Asia, l'America e l'Europa haja il concern pudì expandir lur venditas.
Prognosa per il quint da l'entir onn 2024
En vista al ferm franc quinta la Ems Chemie per l’entir onn da gestiun da nov cun ina svieuta che saja levet sut quella da l’onn passà, ma cun in gudogn che saja levet sur quel da l'onn passà. Il focus da las fatschentas enfin la fin dal 2024 restia tenor il concern sin chattar schliaziuns innovativas per reducir ils custs, l'energia ed il CO2 e per vinavant expandir globalmain.
Plinavant cuntinueschia l'Ems Chemie cun lur plan d'investar var 300 milliuns francs per auzar la capacitad ed l'effizienza energetica dal concern principal a Domat.
