La suprastanza da Cuira sa cumpona pia uschia:
- Urs Marti, PLD
- Patrik Degiacomi, PS
- Sandra Maissen, PCD
Anita Mazzetta (Verda) avess er cuntanschì il pli absolut cun 4'571 vuschs, n'è dentant betg elegida. Er betg dumagnà en suprastanza cun 2'419 vuschs ha Mario Cortesi (PPS). El n'ha betg cuntanschì il pli absolut.
Sco president è Urs Marti vegnì confermà cun 6'445 vuschs tar in pli absolut da 4'826 vuschs.
Betg pensà ch'i tanscha en l'emprim scrutini
Sandra Maissen è stada fitg surpraisa ch'ella ha dumagnà gia en l'emprim scrutini il pass en suprastanza. Ella haja empruvà fitg bler per sa preschentar a la populaziun e per vegnir en contact cun la glieud, ha ella declerà envers RTR.
A Sandra Maissen giaschia sur tut il futur da Cuira per cor. Ella è persvasa ch'igl è per ella in avantatg ch'ella è stada davent per in temp e possia uss esser relativamain imparziala en ses uffizi.
Digren da PBD era a Cuira
La digren da la PBD sa mussa – sco gia sin champ naziunal - era en las elecziuns dal parlament da la citad.
La Partida burgaisdemocratica perda 2 sezs da ses 3 sezs. L’ala cotschen-verda na profitescha dentant betg da questa perdita. Ella resta cun ils 6 sezs da la Partida socialdemocratica ed ils 2 sezs da la Libra glista verda tuttina ferma sco ils ultims quatter onns.
La Partida cristiandemocratica gudogna vitiers in sez ed ha nov 3 sezs. La Partida verd-liberala recaltga era in sez dapli e vegn sin 2 sezs. La Partida populara resta cun 4 sezs la ferma partida burgaisa.
