Cuira ha trais regents - Fa questa giada puspè ina dunna la cursa?

A disposiziun sa mettan:

• Urs Marti, PLD, en uffizi
• Patrik Degiacomi, PS, en uffzi
• Mario Cortesi, PPS
• Sandra Maissen, PCD
• Anita Mazzetta, Glista Libra Verda

Las duas dunnas

Anita Mazzetta, Verda, è enconuschenta sco manadra dal WWF Grischun e posseda suenter diesch onns en il parlament da la citad blera experientscha en la politica locala. Il 2018 ha ella presidià il parlament.

Sandra Maissen, PCD, è creschida si a Cuira. Ils davos decennis ha ella vivì en la Bassa. La giurista è stada nov onns secretaria generala da la Conferenza da las regenzas chantunalas ed ha lavurà avant per PwC.

Cuira ha gì fin uss be ina dunna en l’executiva: Doris Caviezel-Hidber dal 2009 fin il 2016. Ils davos quatter onns han umens timunà la citad. La mancanza da dunnas porscha ad Anita Mazzetta u Sandra Maissen buns aspects en il cumbat electoral.

Partida populara batta persula

Mario Cortesi, PPS, politisescha dapi otg onns en il parlament da Cuira. Cunzunt spargnar e segirtad tematisescha el en ses cumbat electoral. Plinavant vuless l'electroinschigner che la citad investeschia en la transfurmaziun digitala.

El e sia partida battan persuls per in sez en l’executiva. Entant che tschels quatter candidats u candidatas survegnan sustegn anc dad autras partidas.

Ils dus en uffizi

Urs Marti, PLD, è dapi otg onns president da Cuira. Sut sia egida ha la citad sanà las finanzas. Durant la crisa da corona è el sa profilà cun introducir baud mesiras rigurusas cunter la derasaziun da la malsogna.

Patrik Degiacomi, PS, timunescha dapi quatter onns il Departament da scolaziun e cultura. Sut sia egida ha la citad augmentà ils daners per la cultura per radund 40 pertschient.

Ils dus candidats en uffizi èn ils favurits. Lur reelecziun è strusch contestada. Ils votants e las votantas elegian il president da la citad gist enina cun tschels dus commembers da l’executiva.

Partidas fan patg

La PLD, PCD e PBD han fatg patg. Uschia recumonda per exempel la PLD sper ses agen candidat Urs Marti er Sandra Maissen.

Era la PS e la Glista Libra Verda èn sa messas ensemen e recumondan dad eleger Patrik Degiacomi ed Anita Mazzetta.

Segund scrutini

Per esser elegids ston ils candidats cuntanscher ils 27 da settember il pli absolut. Sch’ils trais sezs na vegnan betg occupads quel di, suonda trais emnas pli tard il segund scrutini. Lura basta la maioritad da las vuschs per l’elecziun.