En sasez di Rudolf Minsch ch'i giaja per il mument bain cun l’economia grischuna. L'economia mussa schizunt segns da surstgaudada. Ina sfida è dentant la mancanza da persunal. Senza persunal èsi grev da trair niz or da quella situaziun favuraivla. La fasa pli intensiva da la mancanza da persunal qualifitgà e dentant probabel passada. Uschia il schefeconom d'Economiesuisse, la federaziun tetgala da l'economia svizra.
La situaziun speziala dal Grischun: il turissem
L’enviern che stat avant porta, chaschuna bleras malsegirezzas per l’economia grischuna: inflaziun, crisa d’energia, premias da las cassas da malsauns. Tut vegn pli char. Tge vul quai dir per la stagiun d’enviern, per il turissem? Tenor Minsch na saja quai betg ina nova situaziun. Sport d'enviern è adina stà char. Perquai na quinta el betg, che las persunas svizras na vegnan a far las vacanzas d’enviern era en Grischun. Causa che la situaziun economica en ils auters pajais è dentant pli mala co en Svizra, pudessi dar pli paucs giasts d'auters pajais. Dentant cun pli pauc turissem d’enviern na quinta Rudolf Minsch.
Per il cas d'ina mancanza d'energia
Tuttina dettia dumondas avertas. Numnadamain co precis che la crisa d’energia sa vegn a mussar e tge consequenzas ch'ella ha per il turissem. Las bleras interpresas sajan preparadas per ils pretschs auts d'energia. Minsch na vul betg excluder il cas che tschertas pendicularas ston serrar pervia da quels. Mender fiss sche l'electricitad vegniss propi tschentada giu. Quai vul dir che la buna situaziun da l'economia po sa midar svelt.
