Il zercladur eran ils scienzads e las scienzadas da la Scola politecnica federala ETH anc pli optimistics. La nova prognosa quinta uss dentant cun pli pauc creschientscha economica: L'onn proxim creschia il BIP per 0,7%, uschia che la prognosa è vegnida curregida engiu per 0,6%.
Quai fraina la creschientscha economica
L'inflaziun sminuescha la capacitad da cumpra en il pajais e fa nunattractiv tschertas fatschentas. Quai è la raschun principala per la midada da la prognosa. Però er l'export da rauba en auters pajais sa reducescha cleramain l'onn proxim. In pilaster per la conjunctura resta dentant il consum privat, perquai che las pajas vegnan en blers cas adattadas a l'inflaziun. Quai saja auter che per exempel en Germania, communitgescha il KOF.
A lunga vista vegn l'economia puspè da fitgar pe: L'inflaziun vegn a crudar sut 2% ed il squitsch da pretschs a prender suenter lura. Quai dentant mo sche gas ed ieli restan disponibels en l'Europa. Cas cuntrari vegnia l'economia a sa reducir per 0,4%.
