Il chantun Grischun ha dumandà la Confederaziun da pudair sajettar dus terzs dals lufs giuvens confermads, e quai en mintga triep ch'ha actualmain pitschens. Concret fissen quai 30 dals 45 lufs pitschens ch'i ha dà quest onn fin qua. Ina cifra che po dentant er anc s'augmentar.
Plinavant ha il chantun er fatg la dumonda da pudair sajettar dus entirs trieps da lufs, permess che la basa legala saja dada. Concret pertutga quai il triep da lufs Vorab, sco er ina dumonda provisorica da sajettar il triep dal Beverin, sch'i vegniss constatà ch'i sa tracta en quest cas anc adina d'in triep. Cun ina resposta da l'Uffizi federal d'ambient vegn quintà la fin dal mais. Survegn il chantun glisch verda da la confederaziun, lura ha il chantun en mira da sajettar almain 35 dals radund 120 lufs ch'i dat actualmain en il chantun Grischun.
![Karte der Wolfsrudel im Kanton Graubünden. Vorab und Beverin sind durchgestrichen.](https://www.rtr.ch/static/cms/images/960w/f043477.jpg)
La finamira da questas mesiras da regulaziun saja da reducir ils conflicts en il sectur da l'agricultura e ch'ils lufs han en futur dapli tema vers l'uman, senza dentant periclitar la populaziun da lufs, scriva l'Uffizi da chatscha e pestga en ina communicaziun. Cun questa dumonda sa basa il chantun sin la revisiun parziala da l'Ordinaziun davart la chatscha e la protecziun da mamifers e d'utschels selvadis ch'è ida en vigur il prim da december 2023.
Populaziun da lufs quest onn puspè creschida
Er quest onn è la populaziun da lufs en il chantun Grischun creschida en cumparegliaziun cun l'onn avant, quai cunzunt en ils territoris, nua ch'i n'aveva fin ussa nagins trieps. Actualmain èn confermads 12 trieps e l'Uffizi da chatscha e pestga fa quint ch'ulteriurs trieps vegnan vitiers en il decurs da la stad.
L'emprima regulaziun proactiva da lufs
I sa tracta da l'emprima regulaziun proactiva da lufs che ha lieu durant il temp da regulaziun legal che dura dal prim da settember 2024 fin ils 31 da schaner 2025. «En il futur vali d'observar exactamain ils effects che questa metoda da management – nova ed unica en l'Europa Centrala – vegn ad avair sin la populaziun da lufs», vegn Adrian Arquint, il manader da l'Uffizi da chatscha e pestga, cità en la communicaziun. «Sin fundament da las experientschas vegn ella optimada cuntinuadamain ils proxims onns.»
Durant la chatscha auta gidan las chatschadras ed ils chatschaders la surveglianza da chatscha da sajettar ils entirs trieps – pia il Vorab ed il Beverin, sch'i vegniss constatà ch'i sa tracta en quest cas anc adina d'in triep. Per pudair participar a la regulaziun dals lufs ston las chatschadras ed ils chatschaders absolver ina saira da scolaziun che vegn purschida da l'uffizi da chatscha e pestga. Er tenor la nova Ordinaziun da chatscha n'è il luf anc adina nagina spezia d'animals permessa per la chatscha. Ils lufs sajettads da chatschadras e chatschaders restan en possess dal chantun.