Las inculpaziuns cunter Orlando Zegg sajan nungiustifitgadas, ha Stefan Metzger sutlingià. El ha perfin fatg allusiuns che Orlando Zegg na possia gnanc ademplir – sco derschader singul – in delict dad abus d’uffizi.
Ses mandant haja agì sco derschader a favur dal bainstar da las figlias dad Adam Quadroni cura ch’el haja decretà l’acziun da polizia dal november 2017.
Campagna da medias
Orlando Zegg e sia famiglia hajan patì a moda massiva davart la campagna da las medias cunter el, ha ditg l’advocat. I na saja anc mai capità en Svizra ch’in derschader saja vegnì mess avant dretgira pervi dad abus d’uffizi. Sche quai fetschia scola, lura desistian ils giuvens giuristis en l’avegnir sin ina carriera sco derschader.
Matthias Brunner, l’advocat dad Adam Quadroni, ha fatg valair che l’acziun da polizia dal november 2017 saja stada dal tuttafatg nunnecessaria. Adam Quadroni saja adina stà pront da dar ora las caussas da sias figlias – lezzas vivevan tar la mamma ch’era sa separada la stad 2017. Adina sche Adam Quadroni dastgavia visitar sias figlias, haja el purtà ad ellas vestgadira, termagls, velo, ursets u ils cudeschs, ch’ellas desideravan u duvravan.
Cunigls na van betg en l’auto
Sulet ils cunigls n’haja Adam Quadroni betg pudì transportar en l’auto, perquai che la stalla da cunigls eria memia gronda, ha l’advocat ditg.
Durant l’acziun dal november 2017 aveva la polizia mess en chanvettas per duas uras Adam Quadroni. Perquai ha ses advocat era pretendì che Orlando Zegg saja da sentenziar pervi da privaziun da libertad.
Quai saja «crass impertinent e nunfair», ha l’advocat dad Orlando Zegg replicà pertutgant questa pretensiun.
Prelegì 30 paginas dal procuratur
Il procuratur public n’è betg stà preschent al process. El ha dentant resumà ses arguments en in rapport da radund trenta paginas ch’è vegnì prelegì da la dretgira. Principalmain renfatscha il procuratur ad Orlando Zegg ch’el n’avevia nagina cumpetenza da decretar questa acziun da polizia. Il derschader haja sapientivamain flaivlentà la posiziun dad Adam Quadroni en ses process da protecziun da lètg.
Indizis ch’il derschader Orlando Zegg fiss vegnì instrumentalisà dal cartel da construcziun en l’Engiadina Bassa, n’ha il procuratur public betg fastizà.
La dretgira regiunala Purtenz Tavau decida il cas cun trais derschaders. La derschadra Patrizia Winkler-Rentsch ha manà la procedura. Ella è giurista. Ils dus auters derschaders èn laics.
Per tge vai?
L'accusa encunter Orlando Zegg chattais vus qua sut descrita en detagl:
