Peter Schnyder cumenza sia communicaziun cun far attent sin il cumenzament dals svaris a la Dretgira chantunala, numnadamain cun l'agir dal president Norbert Brunner en in cas d'ierta . Qua haja la cumissiun da giustia dal Cussegl grond constatà ch'el haja violà a moda gravanta l'obligaziun d'uffizi. Il president haja propi midà giu la sentenzia a moda illegala - pia comess ina sfalsificaziun da documents. La valetaziun dals fatgs en la dispita d'ierta da la cumissiun giaja a pra cun la valitaziun da Brunner sez, pretenda Schnyder.
Admoniziun enstagl «grazia fitg»
Sut questas circumstanzas avessi el spetgà che la cumissiun engrazia ad el per sia posiziun consequenta, orientada a la lescha. Enstagl vegnia el chastià cun in'admoniziun ed ina recumandaziun da betg reeleger el. Quai saja ina vaira falsificaziun dal dretg. (Survegnì l'admoniziun ha Schnyder perquei ch'el n'è betg sa participà ad ina sesida per tractar il cas d'ierta. Uschia ha el tenor la cumissiun da giustia violà sia obligaziun d'uffizi. Quai fatg relativescha Schnyder denton cun l'argument da betg avair vulì sustegnair vinavant ils sbagls gravonts dal president Norbert Brunner).
Per la cumissiun da giustia saja pli simpel d'allontanar el sco derschader che dad elavurar la situaziun da mobbing ch'i haja dà cunter el a la Dretgira chantunala, scriva Schnyder. La cumissiun ignoreschia las ovras scandalusas che Norbert Brunner e ses cumpogns hajan comess per zuppentar lur malfatgs. Che betg els mabain el (Schnyder) vegnia chastià saja pervertà il dretg.
La fin finala haja il Cussegl Grond da decider, tge sort Dretgira chantunala ch'el possia e veglia dar al pievel grischun.
Pass giuridics
A la cumissiun duessi esser cler, che questa decisiun disciplinara na tegnia betg pitg ad ina examinaziun giudiziala. La cumissiun s'imagineschia dentant che la chaussa saja liquidada cun proponer da betg reeleger el.
Plinavant remartga Schnyder che la cumissiun da giustia enconuschia ils fatgs relevants en chaussa dapi la stad 2019. L'inquisiziun saja stada chara, inutila ed incorrecta.
Peter Schnyder studegia da contestar giudizialmain las decisiuns da la cumissiun da giustia.
