Distgargia da 3,5 milliardas - Sfidas e pussaivladads en la tgira da confamigliars
Persunas che tgiran lur confamigliars distgargian il sistem da sanadad svizzer. Co che quai vesa or en il Grischun e tge porscha il chantun per sustegnair questas persunas.
En il Grischun datti circa 16'000 persunas che tgiran voluntarmain lur confamigliars. Sche questas lavurs vegnissan tuttas fatgas da persunal professiunal, alura custass il sistem da sanadad da la Svizra var 3,5 milliardas dapli.
Tge èn persunas che tgiran lur confamigliars?
Avrir la boxSerrar la box
Confamigliaras e confamigliars che tgiran èn commembras e commembers da la famiglia, amias ed amis u vischins che s'occupan gratuitamain da persunas basegnusas.
Lur incumbensas èn multifaras:
Tgira da basa
Els gidan per exempel da sa trair en e sa retrair u a tgirar il corp, sco ina figlia che sustegna trais giadas per emna sia mamma che patescha da Parkinson da far la duscha.
Provediment medicinal
Latiers tutga dar medicaments u provediment da plajas. In figl pudess sustegnair ses bab cun COPD tar la terapia d'oxigen e controllar sias valurs vitalas.
Sustegn per l' economia da chasa
Ils confamigliars fan savens cumissiuns, cuschinan u nettegian sco quella figlia che maina ultra da la tgira er il tegnairchasa da sia mamma.
Mobilitad ed accumpagnament
Els accumpognan a termins da medi u andaments d' autoritads, sco in vischin che charrescha regularmain in signur pli vegl.
Sustegn emoziunal
Manar discurs e star da cumpagnia èn aspects impurtants, per exempel sch'il vischin va a spass cun in signur pli vegl.
Organisaziun ed administraziun
Ils confamigliars s'occupan da termins e da dumondas sco il vischin che gida ad emplenir ora formulars.
Tge ha il chantun fatg per sustegnair las persunas che tgiran lur confamigliars?
En il rom dal program da la regenza 2021-2024 ha la regenza dal chantun Grischun fixà 12 finamiras e 29 prioritads da svilup cun 98 mesiras. En il punct 6.2 «Help yourself und deinen Nächsten» vegnan proponidas las suandantas mesiras:
Campagnas orientadas a las gruppas en mira per rinforzar la cumpetenza da sanadad ed atgna responsabladad da la populaziun
metter a disposiziun material d'infurmaziun davart in cumportament conscient da la sanadad
Distgargiar ils confamigliars che tgiran tras purschidas che sustegnan il sustegn
indemnisaziun da persunas che tgiran lur confamigliars avant la vegliadetgna da la AHV
Per incumbensa dal Departament da giustia, segirezza e sanadad dal chantun Grischun ha l'uffizi da sanadad elavurà in plan d'acziun per sustegnair e per distgargiar persunas ch'assistan e tgiran lur confamigliars en il Grischun.
Legenda:
La menadra dal project «confamigliars che tgiran»
Christiane Eggert, coordinatura dal program tar il post spezialisà per la promoziun da la sanadad, ina partiziun da l'uffizi da sanadad dal Grischun
RTR
Tge fa il post spezialisà per la promoziun da la sanadad
Avrir la boxSerrar la box
En il chantun Grischun è il Post spezialisà per la promoziun da la sanadad il center da cumpetenza pertutgant la promoziun da la sanadad e la prevenziun.
Els elavuran e realiseschan programs chantunals e campagnas per promover il moviment ed in nutriment saun, per rinforzar la sanadad psichica e la prevenziun da dependenzas.
Cun differentas purschidas che cumpiglian la prevenziun e la promoziun da la sanadad sustegnan e cusseglian els scolas, vischnancas, instituziuns, posts spezialisads, uniuns e persunas singulas.
En collavuraziun cun organisaziuns spezialisadas dal chantun garanteschan els la cussegliaziun e l'accumpagnament da geniturs cun uffants a partir da la naschientscha fin il tschintgavel onn da l'uffant.
Els èn responsabels per realisar incumbensas legalas da la confederaziun e dal chantun. Latiers tutgan per exempel la realisaziun da la tgira da dents en scola ensemen cun las vischnancas, la gestiun d'in Post da cussegliaziun cunter malsognas transmissiblas sexualmain, sco er la lavur vi dals puncts centrals da svilup dal program da la Regenza.
Co vegnan las persunas che tgiran lur confamigliars sustegnidas finanzialmain?
L'uffizi da sanadad ha gia adattà la lescha uschia che quellas persunas survegnan cumpensaziun da la tgira da basa. Per quest intent ston ellas vegnir engaschadas da la Spitex e ston far ina scolaziun. Uschia pon las prestaziuns da questas persunas vegnir pajadas da la cassa da malsauns.
Las premias da las cassas da malsauns n'èn betg creschidas pervia dal sustegn da persunas che tgiran lur confamigliars.
Legenda:
Il manader da l'uffizi da sanadad dal Grischun
El po s'imaginar che quai è ina gronda lavur per ils confamigliars che tgiran, perquai ch'el n'ha sez bain betg tgirà, ma assistì, ses bab.
RTR
I saja dentant fitg impurtant che las persunas en la tgira survegnian daners persuenter, ha il manader da l'uffizi da sanadad ditg vinavant. Uschia possian ellas reducir lur pensum da lavur normal, gudognan dentant tuttina anc avunda e na vegnian betg surchargiadas da la lavur normala e da la tgira che vegn anc vitiers.
