Reto Branschi è creschì si a Tavau ed ha lura lavurà en divers lieus: en l’ester e giu la Bassa. Per exempel ha el fatg l'emprendissadi a Claustra, è stà a Turitg per far la scolaziun sco contabilist, era magister da skis en Nova Zelanda ed en California. Suenter è el turnà a Tavau ed ha avant 37 onns surpiglià ina plazza sco contabilist tar la destinaziun. Il schef aveva dumandà, quant ditg ch’el fa quint da restar. Là ha Reto Branschi pensà da dir ina auta cifra ed ha ditg tschintg onns. Uschia ha el survegnì la plazza. Or dals tschintg onns èn vegnids 37 onns.
Mes schef ha vis tge tip che jau sun e ma cuvrì cun projects, en ils segn positiv. Uschia erel jau uschè occupà che n'hai mai gì il patratg dad ir.
Per exempel aveva el il project da far in sistem da reservaziun per ils hotels ed era per il WEF. Er la pagina d’internet da la destinaziun era sut sia direcziun. El sa descriva sco persuna fitg interessada en la tecnica. Durant ils 17 onns sco directur aveva el da tschertgar cumpromiss cun tut divers players turistics. Cun var 80 hotels a Tavau n'haja quai dentant betg adina funcziunà. Tavau è numnadamain ina gronda destinaziun en il Grischun, cun ina istorgia che va circa 160 onns enavos.
Il turissem vegn or dal temp da la tuberculosa, nua che ils giasts eran en cura a Tavau.
Per exempel il Holzbör ch'ha investì en la Viafier retica. U il docter Carl Spengler ch'era entusiast da sport ed uschia èsi vegnì tar il Spengler-Cup. Enfin oz rivan giasts internaziunals a Tavau. La gruppa dals gidieus ortodox ha en ils davos onns adina puspè dà da discutar. Tenor Reto Branschi èsi cleramain be ina part da ils gidieus ortodox. I dat projects per meglierar la convivenza. Retrospectiv avess el cumenzà pli baud cun tals projects.
Pass per pass en pensiun
Reto Branschi di che sco directur lavuran ins dapli che 100%. El haja gì pauc temp liber, paucas seras e paucas fin d’emnas. Uschia saja il pass sin 0% memia grond. En il proxim temp lavura el vinavant vi dal project da clima ed in project da digitalisaziun a Tavau. Il timun surlascha el dentant a ses successur Albert Kruker. Reto Branschi è uss 65 onns e s’allegra sin dapli temp liber. El vul esser dapli uras sin il velo ed in giavisch fiss in chaun.
